Blogu i Udhëtarit Kultura Trashegimi Kulturore

Biblioteka e Izraelit publikon dorëshkrime dhe skic-vizatime të panjohura të Franz Kafkës

Kurt Farka on June 6, 2021

Biblioteka e Izraelit publikon dorëshkrime dhe skic-vizatime të panjohura të Franz Kafkës

Një koleksion dokumentesh nga autori Franz Kafka është tani në dispozicion për publikun në internet, pas restaurimit dhe digjitalizimit që iu bë atyre. Ky koleksion përfshin histori të ndryshme, një fletore në të cilën ai praktikonte hebraisht dhe qindra letra personale, skica dhe revista udhëtimi.

Kafka zbuloi talentin e tij për skicime e vizatime në vitin e parë të universitetit. Vizatimet e tij janë kryesisht karikatura groteske të njerëzve që takoi, ose skica të vetvetes. Koleksioni u la në Bibliotekën Kombëtare të Izraelit nga Max Brod, një mik të cilit Kafka i kërkoi që t’i digjte shkrimet e tij pas vdekjes. Por Brod refuzoi dhe i botoi ato, duke bërë që Kafka të njihej si një nga shkrimtarët më të mëdhenj të shekullit XX.

Franz Kafka

Kafka vdiq në vitin 1924, në moshën 41-vjeçare, pas një beteje shtatëvjeçare me tuberkulozin. Rreth 15 vjet më vonë Brod, gjithashtu shkrimtar hebre, u detyrua të largohej nga Çekosllovakia e pushtuar nga nazistët për në Tel Aviv. Ai mbante me vete letrat e Kafkës në një valixhe dhe më vonë filloi të botojë shumë prej tyre. Pasi Brodi vdiq, ai ia la koleksionin sekretares së tij Esther Hoffe dhe i kërkoi asaj të siguronte që ato të arrinin në Bibliotekën Kombëtare. Sidoqoftë, ajo i mbajti letrat deri në vdekjen e saj në 2007, dhe Biblioteka Kombëtare u bëri thirrje vajzave të saj të respektonin dëshirën e fundit të Brodit dhe t’u jepnin atyre dorëshkrimet e mbetura. Duke u ndeshur me refuzimin e tyre në vitet pasuese u hapën disa procedura ligjore.

Biblioteka Kombëtare e Izraelit arriti pas shumë vitesh të merrte këto dokumente dhe më pas të realizonte të gjitha procedurat e nevojshme për restaurimin dhe digjitalizimin e tyre, për t’u bërë të arritshme për publikun, studiuesit dhe fansat e Kafkës në Izrael, e kudo në botë.